जीवाचा आकांत होतो कधी कधी. नेमकं काय हवंय आपल्याला हेच कळत नाही. सगळं असूनही अस्वस्थता पिच्छा का सोडत नसेल बरं ? प्रश्न आलाच होता डोक्यात कि आतल्या मास्तरीण बाई येऊन ठाकल्या. अलगद हसल्या अन बसल्याच सांगायला, म्हणाल्या :
मने..
प्रश्न जगायचं कसं हा असतो आणि आपण अगदी जन्म झाल्यापासून जिवंत कसं राहायचं हेच शिकत असतो. जगायचं कसं हे शिकलोच नाही तर जिवंत राहण्याला अर्थच काय ?? नुसतच तगत राहायचं ..मरण ढकलत राहायचं पुढे पुढे? ... कि मग समरसून जगायचं मरण येईपर्यंत न धास्तावला न थांबता ...
आयुष्यात काही गोष्टी फार उशिरा कळतात ... अगदी आपल्या स्वतःच्या बाबतीतल्याही
आपल्याला नेमकं काय आवडतं, काय आवडत नाही, काय केलं कि आनंद मिळतो हे आधीच स्पष्ट कळलं तर सगळं कसं निवडून घेता येईल ना गं? खर सांगू ते कळतही पण पोटापाण्यासाठीच्या गरजेपोटी पैशांच्या मागे धावायच्या स्पर्धेत आपण इतके अडकतो कि, पोटाच्या भूकेपेक्षाही मनाची भूक खूप खोल आणि मोठी असते ह्याचा थांबून कधी विचारच करत नाही. पोटाला फार फार काय लागतं? पोटाची खळगी भरेल एवढं दोन वेळचं जेवण मिळालं कि झालं...ते भागतं ग कसंही,कुठेही ... मनाची खळगी मात्र इतकी सहज भरत नाही. वास्तविक जगण्यासाठी अंतर्मनाचं समाधान, आत्म्याची तृप्ती जास्त महत्वाची हे कित्येकांना शेवटपर्यंत कळतंच नाही गं, किंवा ज्यांना कळतं तोपर्यंत फार उशीर झालेला असतो.
मनाचं समाधान, सुख, आनंद, यश वगैरे सगळ्यांची मोजपट्टी-फुटपट्टी 'पैसा' हाच नसतो ना, पैसा साध्य नाहीये गं. ते माध्यम असू शकतं फारफार तर एखाद दोन साध्य गाठता येईलही या माध्यमाने, पण सगळी साध्य गाठायला एकच माध्यम नाही ना लागत. वेगवेगळ्या गंतव्याला जायला वेगवेगळे मार्ग असतात अगं, आपण एकाच माध्यमात गुंतून पडतो..साध्य देतो कोपऱ्यात ढकलून..माध्यम मिळवेपर्यंत साध्य काय होतं हे देखील विसरतो....मग सगळंच मुसळ्यात जातं ना राणी. अल्टिमेटली आपला हेतू काय आहे .. आपल्याला हवं ते कशासाठी मिळवायचंय ? मनाचा आनंद, समाधान, तृप्तीच ना ? आपण मिळवतोय काय 'पैसा' ...
सगळं जवळ असूनही हि जी अस्वस्थता आहे ना .. हि तीच आहे ? सगळं जवळ असलेलं हवं होतं का आपल्याला हा कधी विचारच केला नाही ? जे हवं होतं त्यासाठी प्रयत्न केला का या प्रश्नाला उत्तर नाही ना तुझ्याकडे.
अस्वस्थता या न मिळालेल्या प्रश्नांची आहे.. उत्तर शोध आणि उपायही .. मी आहेच पाठीशी.
तुझ्याच
आतल्या मास्तरीण बाई
No comments:
Post a Comment