विषय !

ते कपाळावर आठ्या आणतात
विचारतात... 
काय गं, तू हेही करतेस
तू तेही करतेस..
दिवसरात्र लगलग करत
बरंच काय काय करत असतेस..
कसंच बाई जमतं तुला ?

ती खमकं हसते ..
उत्तरते...

खरं सांगू,
मला बरंच काय काय करायचं नसतं..
टाळायचंच असतं खरंतर ..
ते करण्याची उर्मी दाटून येऊ नये
आसक्ती उफाळून त्रास देऊ नये
म्हणून
बरंच काय काय करत असते

काही काही विसरायला
काहीबाही आठवत असते. 

विषय आठवून, जमवून करण्याचा नसतोच हो
विषय विसरून हसून जगण्याचा असतो ..
तेच करत असते .. 

रश्मी मदनकर
16 मे 18.