अंतर

मागे गेलेल्या काळाच्या कुठल्याश्या त्या क्षणी
एकाच जागी उभे असूनही वाढत गेले अंतर तुझ्या माझ्यातले
कुठल्याश्या एका नात्याने जुळले असूनही
पायापासून जमिनीवर पसरत गेलेल्या
लांबच लांब होत जाणाऱ्या सावल्यांसारखे
लांब होत राहिलो आपण .. वेगवेगळे होत गेलो ..
सोबतीने चालत असूनही सोबत नसणारे
दोन वेगवेगळ्या समांतर मार्गाने पुढे चालत राहायचं
आलेला दिवस ढकलायचा
नाते जपतोय कि ओढतोय आपण ..

कुठला क्षण होता तो दोघांच्या मध्ये लांब आडवी रेष ओढणारा
रेषेइतकेही अंतर निर्माण व्हावे अशी परिस्थिती निर्माण व्हावी हे प्राक्तन का यावे
तुला नाही वाटत का खंत कशाचीच
ती रेष पुसायलाही किती लांबचा प्रवास करत मागे चालत जायला लागणार आहे
हातातला सुटलेला हात धरायला परतीच्या रस्त्यावरही सोबत चालायला लागणार आहे
दोघांचीही तयारी हवी पार केलेला प्रवास सोडून द्यायची
प्रवास महत्वाचा कि साथ हे दोघांच्याही बाबतीत सारखेही असायला हवे
साथ महत्वाची असेल तरच आलो त्या रस्त्याने पुन्हा सोसवत निघण्याची तयारी करता येईल

हे सगळं करत आलोच त्या मध्याला तर ... ?
सोडला होतास हातातून हात तो क्षण खोडून टाकता येईल का रे
पुन्हा धरून हातात हात ... नवा प्रवास सुरु करता येईल
कि फार वेळ झालाय.. रस्ता सुटलाय .. आणि आशाही
तूच सांग
आहे तसंच पोकळ राहणारेय का आयुष्यच जगणं ?
सोबत असणार आहोत का कधी कि फक्त दिसत राहणार आहोत
आणि तुही त्यातच समाधानी आहेस ??