या आहेत त्या चारमधल्या दोघी -
स्थळ - शताब्दी चौक, रिंग रोड
विषय - #SaveChildBeggars
वेळ - ७५ व्या स्वातंत्र्य दिनाच्या पूर्वसंध्येला
शताब्दी चौकात दोनदोनच्या जोडीत या चौघी आळीपाळीने दिसत राहतात. पहिली जोडी आहे १३-१४ वर्ष वयाची आणि हा जो फोटो टाकलाय त्या दोघी असाव्यात २२-२५ तल्या. विशेष म्हणजे चौघींजवळ चार बाळ आहेत.. अगदी छप्पर फाड के दिलंय बघा त्यांना देवाने. ही बाळं एकतर झोळीत निपचित पडलेली असतात किंवा कडेवर रडत, पेंगत बसलेली असतात. दुसऱ्या १३-१४ वर्ष वयाच्या आणखी दोघी मुली आहेत. त्या स्वतःच चिमुकल्या असताना त्यांच्याजवळ प्रत्येकी एकेक चिमुकलं असतं. तुम्ही 'ये किसका बच्चा उठाकर घुमते हो' असं विचारलं की त्या ' मेरा बच्चा है' असं सांगतात आणि तुम्ही पुढला प्रश्र्न विचारण्याआत भरभर भरभर चौक सिग्नल ओलांडून निघून जातात. मग दोन-तीन दिवस गुडूप होतात.
प्रश्र्न असा की प्रत्येकीकडे एक या दराने असे किती चिमुकले असतात यांच्याकडे.. इतक्या ठोकच्या भावाने कुठे मिळतात इतकी लहान मुले ?? एका चौकात इतकी तर शहरात किती .. आणि राज्यात.. देशात ? ही मुले जरा मोठी झाली की काय होतं यांचं.. कुठे जातात ही ? यात मुली असतील तर त्यांचं काय होतं ? यांचं भविष्य काय ? दिवसा असे अत्याचार तर रात्री काय होत असेल ?
या प्रश्नांना उत्तरं नाहीत, त्यांचे कोणीच वाली नाही हे माहीत असूनही गप्प बसवत नाही. ही लोकं, ती छोटी बाळं दिसलीत की छळत राहतात प्रश्र्न.. आपल्याला फक्त बोलता लिहिताच येतं.. निदान तेवढं तरी करावं, ही तळमळ मांडावी पुढे तुमच्या.. म्हणून हा प्रपंच ..
यापुर्वी देखील यावर अनेकदा लिहिलंय त्याच्या लिंक देतेय खाली-
रश्मी पदवाड मदनकर
No comments:
Post a Comment